Албек Ибраимовдун жактоочусу соттук ишти Биринчи Май райондук сотуна өткөрүп берүүнү өтүндү

Автор: Бекболот Сарыбаев
SUPER.KG SUPER.KG
Обратите внимание на дату публикации.

Октябрь райондук сотунда каралып жаткан экс-мэр Албек Ибраимовдун иши боюнча жактоочу Сергей Слесарев ишти Биринчи Май райондук сотуна өткөрүп берүү тууралуу өтүнүч келтирди.

"Мыйзам боюнча кылмыш иши кайсы аймакта катталса, ошол аймактын сотунда каралышы керек. Ал эми кылмыш бир нече аймакта болсо тергөө иши жыйынтыкталган аймактын соту ишти кароого тийиш. Тергөө Биринчи Май райондук Ички иштер бөлүмүндө жыйынтыкталганына байланыштуу бул ишти аталган райондук сотуна өткөрүп берүүнү суранам", - деди жактоочу.

Калган жактоочулардын айрымдары Слесаревдин пикирин колдой турганын билдиришсе, айрымдары сот кандай чечим чыгарса, ошого макул экенин билдиришти. Слесаревдин пикирине каршылыгын билдирген жактоочулар болгон жок. Сот чечим чыгаруу үчүн башка бөлмөгө чыгып кетти.

Буга чейин Сергей Слесарев сотко ишенбөөчүлүк көрсөтүп, ишти башка соттун кароосун өтүнгөн. Бирок сот бул өтүнүчтү канааттандырган жок.

Окуянын чоо-жайы:

2018-жылдын 28-майында УКМК тарабынан “Дастан” ишканасын Албек Ибраимов жетектеп турган учурдагы сатып алуулар боюнча “ишенип берилген мүлктү ыйгарып алуу же жок кылуу” беренеси менен кылмыш иши козголгон. 19-июлда ал ушул эле кылмыш ишинин негизинде камакка алынган. 23-июлда Албек Ибраимовго карата УКМК тарабынан Бишкек шаарындагы жер тилкелерге байланыштуу коррупция боюнча жаңы айып угузулган. Экс-мэр ушул күнгө чейин УКМКнын тергөө абагында кармалууда.
http://www.super.kg/kabar/news/261173/

Источник: super.kg